അദ്ദിക്ർ

'സര്‍വ്വസ്തുതിയും അല്ലാഹുവിനാണ്' എന്ന വാക്കില്‍ ആരംഭിക്കുന്ന 5 സൂറത്തുകളില്‍ ഒന്നാണിത്. അല്‍ഫാത്തിഹ, അല്‍ കഹ്ഫ്, ഫാത്വിര്‍, സബഅ് എന്നിവയാണ് മറ്റു നാല് സൂറത്തുകള്‍. ഇരുട്ട് എന്നതിന്‍റെ ബഹുവചനമായ ഇരുട്ടുകള്‍ എന്ന പദമാണ് സൂക്തത്തില്‍ ഉപയോഗിച്ചിട്ടുള്ളത്. എന്നാല്‍ പ്രകാശം എന്നതിന്‍റെ ബഹുവചനമായ പ്രകാശങ്ങള്‍ എന്ന പദം ഉപയോഗിച്ചില്ല. പ്രകാശം അല്ലാഹുവാണെന്ന് 24: 35 ലും; പ്രകാശം അദ്ദിക്ര്‍ ആണെന്ന് 5: 15-16 സൂക്തങ്ങളിലും; അല്ലാഹുവിലേക്കുള്ള വഴി പ്രകാശമായ അദ്ദിക്ര്‍ മാത്രമാണെന്ന് 7: 157 ലും പറഞ്ഞിട്ടുണ്ട്. മറ്റുള്ള വഴികളെല്ലാം അഥവാ ആയിരത്തില്‍ തൊള്ളായിരത്തി തൊണ്ണൂറ്റി ഒമ്പത് വഴികളും അന്ധകാരങ്ങളും പിശാചിന്‍റെ വീടായ നരകക്കുണ്ഠത്തിലേക്കുള്ളതുമാണ്. നിശ്ചയം ഇതാണ് നേരെച്ചൊവ്വെയുള്ള പാത, അപ്പോള്‍ അത് നിങ്ങള്‍ പിന്‍പറ്റുക, ഇതര മാര്‍ഗങ്ങള്‍ നിങ്ങള്‍ പിന്‍പറ്റുകയും അരുത് എന്ന് 6: 153 ല്‍ പറഞ്ഞിട്ടുണ്ട്. 14: 1 ല്‍, ഗ്രന്ഥം അവതരിപ്പിച്ചിട്ടുള്ളത് തങ്ങളുടെ നാഥന്‍റെ സമ്മതപത്രമായ അതുകൊണ്ട് ജനങ്ങളെ അന്ധകാരങ്ങളില്‍ നിന്ന് പ്രകാശമായ അല്ലാഹുവിന്‍റെ മാര്‍ഗത്തിലേക്ക് പുറപ്പെടുവിപ്പിക്കാനാണെന്ന് പറഞ്ഞിട്ടുണ്ട്. 64: 2 ല്‍, അവന്‍ അല്ലാഹു തന്നെയാണ് നിങ്ങളെ എല്ലാവരെയും സൃഷ്ടിച്ചത്, നിങ്ങളില്‍ കാഫിറുണ്ട്, നിങ്ങളില്‍ വിശ്വാസിയുമുണ്ട്, നിങ്ങള്‍ പ്രവര്‍ത്തിച്ചുകൊണ്ടിരിക്കുന്നത് അല്ലാഹു സദാ വീക്ഷിച്ചുകൊണ്ടിരിക്കുന്നവനാണ് എന്ന് പറഞ്ഞിട്ടുണ്ട്. 2: 165 ല്‍ വിവരിച്ച പ്രകാരം ഫുജ്ജാറുകള്‍ അല്ലാഹ് എന്ന് നാവുകൊണ്ട് പറയുന്നുണ്ടെങ്കിലും അവരുടെ ഹൃദയത്തില്‍ പിശാചിനെ കുടിയിരുത്തിക്കൊണ്ട് നാഥനിലേക്ക് എത്തിപ്പെടാന്‍ ഇടയാളന്മാരെയും ശുപാര്‍ശക്കാരെയും ജല്‍പിക്കുന്നവരാണ്. അതുവഴി അവര്‍ പ്രപഞ്ചനാഥനായ അല്ലാഹുവിന് സമന്മാരെ വെക്കുന്നവരാണ്. 1: 1; 2: 2, 213, 256-257; 3: 7-10; 4: 150-151 വിശദീകരണം നോക്കുക.